C朗回歸真的很興奮，一般預期佢會喺今個星期六曼聯對紐卡素嘅賽事上陣，全球觀眾都引頸以待，估計有189個國家同地區可以透過電視直播觀賞，但有五個國家嘅觀眾就無咁好彩喇，分別係北韓🇰🇵、古巴🇨🇺、阿富汗🇦🇫、土庫曼🇹🇲，同埋……英國🇬🇧！😱😱😱
筆者以前同大家介紹過，英國為咗保障低組別球會門票收入，避免球迷掛住睇大球會直播而唔入場，多年來都有法例禁止當地電視台逢禮拜六 14:45-17:15時段內直播任何足球賽事。
今時今日呢項規定仲係咪合時就見仁見智。而播映權金額全球最高嘅英超，一向都係公佈賽程後，由本土播映權持有者選擇每週直播場次，將有關賽事改到禁止時段以外進行。但係當 Sky 同 BT Sports 挑選九月份直播賽事時，大家都未知C朗會回歸曼聯，兩間都無揀到直播呢場賽事，所以就罕有地踢禮拜六下午三點喇！
今個禮拜六晚，大家收得最多嘅message, 可能係英國朋友send 嚟嘅 “any link?”
延伸閱讀：英超轉播權安排隨時令你朝聖計劃泡湯！ https://football.fanpiece.com/m/FootballFinance/c1348041.html
Search